TeddyBoy

牛佬的話

大家好，話咁快又到禮拜四．．．

■近排，最令全世界人都關注嘅，當然就係日本嘅大地震。呢次地震嘅威力相當龐大，加上接近香港，對牛佬同唔少香港人嚟講，自然感受之深。執筆嘅時候，因為有核電站爆炸，仲話Ｄ輻射會殺到嚟香港，攪到大家更加心驚驚嗰隻。

本來，呢Ｄ咁嘅大型天災人禍，每隔一段時間就會出現，每次過咗之後，大家都好快重新過返正常嘅生活，之不過，每次見到呢類天災，個心硬係有Ｄ唔平伏，尤其個人年紀愈大，嗰種唔知幾時就會世界末日嘅感覺，好似愈嚟愈強烈咁，真係吹漲。

點都好，希望災情帶嚟嘅影响盡快過去，全世界亦可以盡快回復平靜嘅生活，唔駛大家不停擔驚受怕咁。

■講返敝刊，伊文華同世顯嘅衝突已經去到尾聲，要嘈要打嘅都已經八八九九，係時候要幫伊文華收拾殘局。當然，邊個有能力攪掂壇嘢之際，又會畀到伊文華一Ｄ深刻嘅教訓，而令佢\改變一貫嘅做人作風？相信大家心目中，一定有個必然嘅人選。

冇錯，佢\就係我哋《古惑仔》嘅靈魂角色──陳浩南勒！換言之，南哥將會喺呢幾期之內再度蒲頭，喜歡南哥嘅老友記，要𥄫實勒！

■最後，又想提吓我哋出版咗嘅「重修本」，如果大家有留意嘅話，應該發覺我哋嘅「重修本」已經轉為「雙週刊」出版形式，喺度，希望呢個出版嘅時序可以不斷KEEP住，而捧場開嘅老友，亦記得每兩個禮拜就去報攤𥄫實勒！

ＯＫ，又要過隔離答吓讀者Ｄ來信，過幾日再傾過，BYE！

2011年03月17日